ഇതിവൃത്തത്തിലെ സ്വീകാര്യതയും അവതരണത്തിലെ വൈവിധ്യവും കൊണ്ട്‌
സമ്പന്നമായിരുന്നു ഡോക്യുമെന്ററി മേളയുടെ നാലാം ദിവസം. ദിര്‍ഘ-ഹ്രസ്വ
ഡോക്യുമെന്ററി, ഷോര്‍ട്ട്‌ ഫിക്ക്‌ഷന്‍, ഹോമേജ്‌, ഇന്റര്‍നാഷണല്‍, മിഡില്‍
ഈസ്റ്റ്‌, എന്‍വയോണ്‍മെന്റല്‍, ഷോക്കേസ്‌
എന്നീ വിഭാഗങ്ങളിലായി 40 ചിത്രങ്ങളാണ്‌
ഇന്നലെ പ്രദര്‍ശിപ്പിച്ചത്‌. പ്രേക്ഷക പ്രശംസയേറ്റുവാങ്ങിയ ചിത്രമായിരുന്നു വൈഷ്‌ണവി
സുന്ദര്‍രാജന്‍ സംവിധാനം ചെയ്‌ത `ഡോള്‍'. ഒരു പെണ്‍കുട്ടിയും
ബാര്‍ബറും തമ്മിലുള്ള ആത്മബന്ധത്തിന്റെ കഥയാണ്‌ ചിത്രം പറയുന്നത്‌. പെണ്‍കുട്ടിയുടെ
വളര്‍ച്ചയുടെ ഘട്ടത്തില്‍ അവരുടെ ബന്ധത്തിലുണ്ടാകുന്ന വ്യത്യാസങ്ങളാണ്‌ ചിത്രം
പങ്കുവെക്കുന്നത്‌. വിപിന്‍ പി. സമല്‍ബാരി സംവിധാനം ചെയ്‌ത `ജസ്റ്റ്‌
ആന്‍ അണ്ടര്‍വയര്‍' പ്രമേയവൈവിധ്യംകൊണ്ട്‌ ശ്രദ്ധേയമായി.
ഭാര്യ വീട്ടിലില്ലാത്ത സമയം സുഹൃത്തുക്കളോടൊപ്പം ആഘോഷിക്കുന്ന ഭര്‍ത്താവിന്‌
പിന്നീട്‌ നേരിടേണ്ടിവരുന്ന പ്രശ്‌നങ്ങളെ ചിത്രത്തില്‍ ആവിഷ്‌കരിച്ചിരിക്കുന്നു.
പ്രേക്ഷകശ്രദ്ധയാകര്‍ഷിച്ച മറ്റൊരു ചിത്രമാണ്‌ സുനിത്‌ സിന്‍ഹ
സംവിധാനം ചെയ്‌ത `കൗണ്ടര്‍ വയലന്‍സ്‌'. അനുരാഗവിവശയായ
ഭാര്യ കിടപ്പറയില്‍ ഭര്‍ത്താവിനാല്‍ അപമാനിക്കപ്പെടുന്നതിനെത്തുടര്‍ന്ന്‌
പുരുഷകേന്ദ്രീകൃതമായ സമൂഹത്തിനെതിരെ അവള്‍ പ്രതികാരമനോഭാവത്തോടെ പെരുമാറുന്നത്‌
കയ്യടക്കത്തോടെ സംവിധായകന്‍ചിത്രീകരിച്ചിരിക്കുന്നു. കൈകാലുകള്‍ മാത്രം
കഥാപാത്രങ്ങളാകുന്ന ചിത്രമാണ്‌ മനോജ്‌ വര്‍ഗീസ്‌ പാറക്കാട്ടില്‍ സംവിധാനം ചെയ്‌ത `ദി
ഫെയ്‌സ്‌ലെസ്‌ മാന്‍'. ചിത്രീകരണ ശൈലിയുടെ
വ്യത്യസ്‌തതകൊണ്ട്‌ ഹര്‍ഷാരവത്തോടെയാണ്‌ പ്രേക്ഷകര്‍ ചിത്രം സ്വീകരിച്ചത്‌.
പാഞ്ചാലി രാജകുമാരിയുടെ മനോവിചാരങ്ങള്‍ അനാവരണം ചെയ്യുന്ന `മത്സ്യാവതാരം' സംവിധാനം
ചെയ്‌തത്‌ ശ്യാം സുന്ദറാണ്‌. ചിത്രം പുനര്‍ജന്മങ്ങളുടെ കഥ പറയുന്നു.
No comments:
Post a Comment